سمعت عن .. ( الأرقام الخداعة ) .. ؟؟

يعني ايه ... ؟؟ 

المصطلح ده يعنى باختصار...
           (أرقام يستعملها السادة المسؤولين لتبيض صفحتهم أمام السادة المسؤولين الأعلى منهم ... و قدام الشعب )

إزاي .. ؟؟

خد المثال ده .... 

قال أحد مسؤولي وزارة الاستثمار في تصريحات صحفية، «إن الاستثمارات الأجنبية زادت بنسبة 9% من حجم الاستثمارات الإجمالي في مصر العام المالي 2014 – 2015». 

خبر من الطلعة الأولة خبر تمام من غير كلام ، ولكن ازاي يكون خبر صح و تمام ... لو اكتشفنا أن حجم الاستثمارات الأجنبية انخفض في «2014 -2015» عنه في عام «2013 – 2014» بمقدار 1 مليار جنيه، لغاية ما وصل إلى 6.1 مليار جنيه بعد أن كان 7.1 مليار جنيه.
هنا الوضع مختلف يا سادة الرقم بقه مضروب ويحتاج لى بحث و تمحيص

خد كمان مثال ... 

.. أرباح قناة السويس

نشرت أحد الجرائد: «قناة السويس تحقق أعلى إيراد سنوي في تاريخها» وجاء في متن الخبر، إن قناة السويس زادت إيراداتها بمقدر 42 مليون جنيه بعد أن وصلت إيراداتها إلى 37 مليار جنيه، وذلك عن العام السابق،

طبعا خبر تمام .. و لازم نهتف بالروح و الدم نفديك يا كراوسون و الهنا ال هنكون فيه 

ولكن الجريدة نست تفصيله صغيرة للقارئ .. مقلتش أن الدولار زاد سعره خلال السنة دي بمقدار 140 قرشا بسبب انهيار عملتنا الموقرة ( الجنية ) ، وهي دي الزيادة التي أدت بدورها في ارتفاع إيرادات القناة من غير ما تزيد عدد السفن المارة من القناة.
... يعني أرباح " فرق العملة "

طيب نعمل ايه ... و نكشف الحكاية ازاي ؟
- تسمع الرقم تجري تعمل إجراء مقارنة سريعة بين الأرقام دي ونسبتها و ال زيها من السنة ال فاتت
- تسمع الرقم تدور عن أسباب التغير بالزيادة أو بالنقص، لأن الأسباب دي هي ال هتكشف لحقائق ممكن تغير من نظرتنا للمعلومات
   الموجودة بالخبر زي خبر قناة السويس.
- لازم و لابد انك ما تخدش بأرقام السادة المسؤولين على أنها حقائق مسلم بها، لكن لازم تجري تدور علي صحها فين
----
و قبل ما نمشي ... شوف بقه اخر طريقة للعب بالأرقام ...يديك رقم في إجمالي العنوان يملي العين تيجي تجمع الحسبة تلاقيها مخرمة
لما يقول .... في العنوان: «تخصيص 600 مليون جنيه لتطوير 7 مدن جديدة»، 

وفي الحشو نوضح أن الحكومة اعتمدت 80 مليون جنيه لتطوير مدينة العاشر من رمضان، و60 مليون جنيه لتطوير مدينة السادات، و73 مليون جنيه لتطوير مدينة العبور، و87 مليون جنيه لتطوير مدينة الشروق، و50 مليون جنيه لتطوير مدينة أكتوبر، و100 مليون جنيه لتطوير السويس الجديدة، و50 مليون جنيه لتطوير مدينة دمياط الجديدة»،

و بحسبة صغيرة علي ورقة فرط .. نلاقي أن مجموع المبالغ المخصصة لتطوير المدن الجديدة 550 مليون جنيه، أي أقل من الموجودة بالعنوان بـ 50 مليون جنيه،

.... و دول مش حاجة فرط علشان نقول مجازا

و الحل ؟
طقم حسيبة و كتيبة و صحافة مطقطقة علشان منلبسش أرقام الواقع في واد و الرقم في واد .. و الكل يشتغل بيها العباد